Namur - Samedi 3 octobre et toute la semaine précédente – Fête aux Langues de Wallonie.
La Fiêsse a nôs lingadjes, ène rèyeûssite !
Au cours de l’après-midi, Hermione Lespagnard (Érezée) s’est distinguée au tournoi de récitation. Cliquez ici pour télécharger la page que l’Avenir du Luxembourg lui a consacrée et cliquez ici pour visionner quelques belles photos de participants à la fête.
C' astot ène vrêye gadjûre du mète çu fiêsse la su pîd, mês come tourtous s’ î ont mètu, t’t-afwêt è bin routé, du prumî djoûr avu ène sèyance acadèmike k’ è rassan.né dès djins rèsponsâbes dul politike èt dul cuture, ôs dêrin djoûr : la fiêsse lèye min.me. Çu dîmatche la è veû lès djins dès soces dud pa t’t-avo la Walonîye s’ rascontrer, moustrer leûs publicâcions, partadjer èssan.ne dès-îdêyes, mzèrer sès counichances tins du Walonissime, et pou fini, tchanter avu lès musicyins d’ Compost Binde. Tins dul sumwin.ne du pus d’ chî mile djins, brâmint dès djon.nes, ont vnu lîre û tchanter du walon dins lès bibliotèkes, d’s-ôtes ont lî dins leûs scoles û dins dès soces d’ leû comune... Jamwês on n’ avot lî ostant an walon su ène sumwin.ne ! A rfé bin chûre. Lu concoûrs du nûmots è bin routé avu mwintes avoyadjes, nosse walon vike doûwô. Brâmint d’ bês mots ont sté propôzés ôs djins du juri ; lès mèyeûs sront rassan.nés dins ène publicâtions dins lès smwin.nes ki vnèt.
In pô pa t’t-avô, dèrant çu smin.ne la èt pus lôdjmint tins d’ tout ç’ mwès d’ sètambe la, mwintes animâcions, ont sté organisêyes pou l’ ocâsion, avu jènèralmint in franc succès, dul Picardîe al Gôme, du nôrd ou sud du payis walon. Ça fwêt k’ tout in dèrame è sté fwêt ôtoûr du nôs ptits lingadjes, dins lès gazètes, mês ossi dins lès contrêyes ; inla, brâmint dès djins, nin pou ostant mimbes du soces walones, ont moustré d’ l’ agrè èt s’ ont intèrèssé a nosse lingadje. C’ èst la l’ cayèt l’ pus pwârtant èt l’ pus acouradjant.
C’ èst adon l’ moumint d’ boucher su l’ clô, ca moutèt k’ dins dîj û kinze ans i srè trop tôrd. D’ abôrd, rumète l’ ovradje su l’ mustî, c’ èst ma fwè bin anondé, min.me s’ i fôt rbate lès côtes. Èt deûjim’mint, adji addé lès politikîs èt lès rèsponsâbes culturèls pou k’ i prindinche ègzampe su l’ Bretagne û l’ Catalogne, pou anonder ène vrê politike d’ acouradjmint èt soutnu dins lès scoles l’ aprintichadje du nôs ptits lingadjes. Dju comptant inla, su lès soces ki nous rprèsantant ou dzeûs dul chôle d’ aspoyer du toutes lès manîres possibes lès prodjèts ki sont fwêts pou chaper nosse patrimwane lingwistike.
Pierre OTJACQUES
